‘T’ia dorëzojë PD-në Berishës’. Manjani: – Shansi i fundit që Lulzim Basha të mbetet në politikë.
‘T’ia dorëzojë PD-në Berishës’. Manjani: – Shansi i fundit që Lulzim Basha të mbetet në politikë.
26 tetor 2017
Ish-ministri i Drejtësisë, Ylli Manjani mendon se Lulzim Basha ka një shans për të qëndruar me dinjitet në politikë, nëse vendos t’ia dorëzojë Partinë Demokratike Sali Berishës.
I ftuar në A Show me Adi Krastën në Syri Tv, Manjani thotë se PD sot është zero në elektorat dhe PD-ja e vërtetë është lëvizja e liderit historik të demokratëve, Berisha.
“Nëse Gjykata e Parisit ka vendosur të gjykojë vërtetësinë e të dhënave për vendimin e Blinken, është një lajm i mirë. Pavarësisht se në këtë mes është z.Berisha, por historia është që kushdo që është i fyer, i nëpërkëmbur nga një shtet tjetër, pa prova, do të duhet të ketë një mënyrë. Unë di që Berisha nuk ka kërkuar të hiqet statusi ‘non grata’, por mos shpif, ky është thelbi i gjyqit. Nëse Gjykata e Parisit e ka pranuar, është një gjë e mirë, pozitive.
Realisht nuk e kisha menduar që z.Berisha do të kishte dëshirë për t’u kthyer në Partinë Demokratike. Nuk jam i sigurt që është gjëja më e mirë e mundshme për një parti politike. Mendoj se lëvizja e Berishës ishte gjëja e duhur në këto çaste kur PD po atrofizohej duke fjetur dhe të gjithë i shkonin nga pas dhe nuk e merrnin vesh nga po vinte, PD nuk ka fituar asnjë betejë dhe kjo lëvizje i ka dhënë një farë gjallërie. Sot PD ëhstë një hiç elektoral, është një zero elektoral. Po të kishte zgjedhje PD do të ishte zero”, u shpreh Manjani.
Pjesë nga intervista
Adi Krasta: Çurçill është rikthyer. Charles de Gaulle. Presidenti Trump hapur ka deklaruar se mund të rikthehet…
Ylli Manjani: Nëse Berisha do të rikthehet, nuk ka çfarë të rikthejë, sepse ai është kryetar i PD. Nëse kjo ndodh do të ishte mbrojtja më dinjitoze e fundit e ndershme që mund t’i bënte Lulzim Bashës, sepse Lulzim Basha do duhet t’ia dorëzonte partinë liderit të vërtetë. Është tjetër gjë t’ia dorëzonte një tjetri, do ta rëndonte pak. Është një shans i fundit që i jepet Lulzim Bashës për të qëndruar me dinjitet në politikë, nëse kjo do të ndodhë.
Adi Krasta: Historia e një bashkëjetese të çuditshme mes dy PD-ve, PD-së territoriale dhe PD-së institucionale. Tomor Alizoti tha se të dy PD-të nuk mund të bënin sikur nuk ekzistonin njëra apo tjetra dhe se ajo duhej marrë në konsideratë dhe për ta ulur në tavolinë…
Ylli Manjani: Asnjë blasfemi nuk ka një politikë. Ndodh çdo gjë. Amerikanët kanë sjellë në pushtet talebanët pas 20 vitesh luftë. Janë në pushtet sot me marrëveshje me qeverinë amerikane, janë në pushtet pa zgjedhje. Por unë nuk besoj se ka dy PD, por vetëm një PD, PD-ja që drejton Sali Berisha.
Adi Krasta: Është një lajm i keq për kryeministrin rikthimi i Berishës në krye të PD…
Ylli Manjani: Nuk e mendoj kështu. Kryeministri është analizë tjetër. Së pari, destatuimi i Lulzim Bashës ka ndodhur për shkak të veprimeve të tij. Është një kryetar jo rezultativ. Kohët e fundit, së dyti, më ka habitur me idetë thellësisht komuniste që propozon dhe i mbron me zell. Është gati që të shkatërrojë sistimin politik demokratik të 30 viteve të ardhshme vetëm se pse nuk ulet me Sali Berishën. Të vendosësh Parlamentin në SPAK, është t’i thuash popullit nuk pyes për votën tuaj sepse vendimet i merr SPAK-u.
Adi Krasta: E konsideroni një lloj kalimi të pavarësisë së institucionit më të rëndësishëm të pushtetit tek një agjenci…
Manjani: Tek një agjenci e cila në fund të ditës varet apo jo nga Rama, ç’punë ka Prokuroria të caktojë mandate. Mandatet i ndan populli. Nëse Lulzim Basha vendos ta propozojë është komunist, rikthimi i frikshëm i Frontit Demokratik.
Tv Syri